【飛行報告】疫情下搭長途機，體驗到底如何? LX139 香港 - 蘇黎世 瑞士航空 SWISS Economy Class
相信大家都應該都應該有一排無坐過飛機…… 而家又走去整個第三波疫情，應該有排都唔使出去玩! 係度都係希望大家身體健康，百毒不侵……
我自己因為某 d 技術性問題，兩星期前坐瑞士航空，經蘇黎世返咗去倫敦 (kind of 死好彩避開咗第三波……)。於是我就趁呢個機會，記錄一下「後肺炎時期」坐長途經濟艙嘅體驗。講明先，我絕對唔鼓勵呢個時勢喺無必要嘅情況下搭飛機，真係有風險。如果要搭嘅話，亦應該要戴口罩 + 保持個人衛生!
真係焗住要走......
話說我係三月中，因為要避開英國疫情而選擇返香港。當時仲要非常幸運地，竟然喺出發前三日，搵到張 £416 (HKD 4100) 瑞士航空來回倫敦 - 香港嘅機票。回程一開始 book 咗四月尾，不過歐洲嗰陣肺炎爆到七彩，大部分航班都取消晒，我張回程機票亦順理成章地變咗做 open ticket! 張 open ticket 容許我一年內重新訂位一次，fare difference 都唔收!
不過我本身係攞住 Tier 2 Visa 喺英國做嘢，就算喺香港 working from home 嘅時候，我都要日日同英國嘅同事開會。同埋因為想攞 citizenship 嘅關係，一年來唔可以離開英國多於 180 日，而計埋之前嘅 business trip + 旅行 (包括之前坐 SQ 頭等套房)，我七月尾就會爆 quota，所以我決定七月頭返去。
Rebooking 其實好簡單，我預先上咗 SWISS 官方網站搵定邊日有飛機，再打去 hotline rebook，Hotline 亦都唔使等。成個過程，由打電話，到 email inbox 受到新嘅機票，唔使 10分鐘!
頂! 班機咁 X 滿嘅?!
我一開始預計班機應該唔會好滿，因為大部份人都唔敢而家搭飛機，而且飛到第二度又分分鐘要隔離。正因為咁，我亦 turn down 咗 £540 升去商務艙嘅 offer，諗住可以喺 Econ 中間搵四個位攤開訓。點知，一做 online check-in...
頂！ 咁X滿嘅?!
當時 Economy Class 已經有多過一半嘅位比人揀咗。過多幾個鐘頭再 check，已經見到差唔多 8成嘅位有人，真係 O 晒嘴... 好彩都叫做揀到第一行 bulkhead 嘅窗口位，惟有匿埋一邊，自求多福啦......
不過，機場係拍烏蠅嘅.....
Flight details
航班編號: LX 139
日期: 05 July 2020
航空公司: 瑞士國際航空 Swiss International Air Lines
機型: Airbus A340-300 (HB-JMA)
起飛時間: 23:45
抵達時間: 06:10
飛行時間: 12 hours 25 minutes
座位: 23K (窗口, bulkhead)
我一如正常，航班起飛前 2小時去到機場。一入到機場第一眼嘅感覺係 : 「無人嘅?」我真係未見過香港機場係咁人跡罕至，好似圖書館咁靜!! 連航班顯示屏都有一半係吉嘅，而其中一個 mon 係顯示緊第二朝嘅航班...
因為我本身有星空聯盟 Star Alliance 金卡，所以我可以直接用 first class check-in counter。不過就算 Economy class check-in 都唔使點排隊。不過幫我 check-in 嘅地勤話，經濟艙真係 9成滿，而且香港所有 Star Alliance 嘅 lounge 都閂晒，所以無 lounge 用...
Check-in counter
因為無 lounge 用嘅緣故，所以我喺客運大樓入面兜咗幾個圈，發現除咗 7-11, Starbucks 同快餐店之外，其餘舖頭基本上都係閂晒。唯一見到比較多嘅，係維修工程同工人......
上機喇 - 一定要帶口罩!
既然無乜嘢睇，於是我好早就去到登機閘口，終於比我見到傳說中嘅 9成滿，真係好多人。我都係決定坐遠少少，費事同咁多人聚集。不過都比我隱約見到唔少人唔係攞住瑞士航空嘅 boarding pass，而係攞住 Air New Zealand / 國泰嘅登機證，所以佢哋好有可能係澳州 / 新西蘭嚟嘅轉機客。我甚至聽到有人用越南話對話......
同樣因為有金卡嘅關係，所以我唔使排 Economy Class 條隊，而係同 business class 一齊優先上機。去到機門，會有個 flight attendant 派張消毒紙巾比你。至於座位上嘅用品，望落係無少到，毛氈枕頭耳機都有。另外，瑞士航空規定所有乘客係飛機上必須戴口罩，飲食期間除外，不過你無口罩嘅話，瑞士航空係唔會免費提供。
成個登機過程都係好快，好 smooth。而我就用自己帶嘅滴露消毒紙巾抹乾淨張櫈先坐......
服務上嘅變化
同三月返港相比，我覺得呢程機最大嘅分別係所有 flight attendant 都有戴口罩。 ( 三月無一個 flight attendant 有戴……)
餐飲服務亦有作出變動 - 依家正餐同飲品會一次過 serve，而唔會好似以前咁分兩輪。
飛機餐嘅份量應該無 cut 到，依然有 starter, main course, dessert, 麵包等等...... 我個人其實比較鍾意新嘅服務方式，因為真係快好多，多啲時間瞓覺!
SWISS Economy 娛樂系統 + 座位評價
瑞士航空暫時用緊 Airbus A340 飛香港，而佢嘅 Economy class seat map 中，螢光綠色嘅位係舒服過其他 econ 位好多 : 呢 d位唔單止有 extra legroom，而且仲有個真正嘅 leg rest, 個人覺得係舒服 + 易瞓好多! 想預先揀定呢類座位要畀 CHF 60, 但係 online check-in 期間係可以免費揀!
SWISS 嘅娛樂系統都唔差 - 坦白講我呢程機無乜點用，因為想盡量瞓覺，不過佢 sit-com 嘅內容都算 updated。我上一程機都有用 SWISS 嘅 WiFi，速度唔差，upload ig stories 完全冇問題，不過要額外俾錢......
要填表 - 記得帶筆!
現時大部分國家都會要求入境嘅乘客填一份 passenger locator form, 瑞士亦唔例外。但係瑞士連轉機嘅乘客都要求佢哋填一份，所以你如果真係要搭飛機，最好隨身帶定支私家筆。你可以問 flight attendant 借，不過佢支筆分分鐘有幾千人掂過......
歷久不衰嘅「SWISS chocolate」
瑞士航空 SWISS 其中一項服務特色就係臨降落前，flight attendant 會向每位乘客派一塊朱古力，就算疫症期間呢項服務依然有維持。總括而言，成程機都好定好舒服，冇乜氣流，我亦瞓到大約 5-6 個鐘。不過，三個月前有實施嘅「分組落機」措施好似已經取消咗，所以 d人都係一窩蜂咁落機，轉機嘅位置亦都非常多人，等我下次再寫。
Bottom line
都係嗰句，如非必要，呢排都係唔好搭飛機住! 不過假若真係要飛，仲要飛長途嘅話，最緊要都係做足「安全措施」，注重個人衛生，其實最終嘅體驗唔會太差。瑞士航空 SWISS 其實算好，起碼服務上冇乜點 cut 到，疫情前有提供嘅嘢，依家一樣有，只係可能服務方式會有少少分別。
